2022-12-17: Orbaizetako arma olaren kantua (Aiezkoako mendietan)

Interpreteak eta bideoaren egileak: Bostak eta Laurenak

ORBAIZETAKO ARMA OLAREN KANTUA AIEZKOAKO MENDIETAN

Orbaizetako arma-olaren horma zaharrak suzko ekaitz dardartsu guziak jaurtikiaz jasanik, kondaira urratu baten ezaugarri bezala, xoilki, bakardadean geldituak. Beren baitatik ohizko bidean erreka iheskorra badoa, harriez maitemin eta lehen-minez eten gabeko joanean, hezetasun orlegiz itzala jauntziaz, eta uraren murmurio zoroak hantxe du aurkitzen oihartzunaren lillura. Nortasun sarkorra darion jaure sendoa, gure nahi eta ezinezko izate hautsiaren irudi apurtua. Zahartuegia dagoen gure ez izatearen mina ixurtzen ari den sabel sofritua. Eta eguneroko bakardadean, ixil ixilean, nehor ere ohartu gabean, suzko, burdinezko eta zizpazko oroitzapen zaharrak kopletan jalgitzen dira hormetan erroak dituzten zuhaitzetan gora.    ...Eta basoilarrak kantatzen du Iratiko basoan.

Hitzak: Jose Angel Irigarai             Musika: Benito Lertxundi

2022-12-17: X. urteurreneko bideoa

Jabier Axpe kantukideak osatutako bideoa

X. urteurrenari bertsoak

HAMAR URTE KANTUAN

Bi mila eta hamabi urtean lagun batzuek pentsatu herri hontako kale giroa behar gendula alaitu, ta hortarako onena zela euskal kantua suspertu ordutik hona Kantaguneak hamar urte egin ditu. Munduan zelan dagoen begira: negar ein beharko genuke bazter askotan tiro eta bonba hor dabiltza su eta ke, hortaz bizitza tristea dela denok esan genezake Kantagunerik ez balitz baina tristeagoa litzateke. Egia esanda ezken bolada ez dugu izan onena birus zital bat etorri zen ta aldrebestu zigun dana bihotza ere apurtu jakun zugatik Sergio laztana baina kantuak hurbiltzen gaitu joan ziren horiengana. Urte hauetan ene lagunok oroipen multzo itzela dantzaldi txango eta kalejirak    kantulagunak bezala diote kantuz bizi den orok iraun egiten duela eta euskeraz egiten badu ez dela hilko sekula!

Hitzak: Jokin de Pedro

Plentzia Kantagunearen 10. urteurreneko bertso laburrak

Kantagunetik kantagunera kantari dugu gogoa, hainbeste kalek, hainbat tabernak ikusi gaitu kantutan. Denborak aurrera bultzaturik hamar urte betetzean arrastoren bat utzi dugula hobe dugu pentsatzea: kantak ereitearekin batera haizatu dugu euskera. Baina bizitzak ez du etenik: ez gara hemen geldituko, Plentzia, Bizkaia, Euskal Herri osoa    izango dugu lekuko; kantarik kanta kalerik kale euskaraz alai ta tinko, beste hamar urte egiteko asmoa talde honentzat ez da nahiko: beti elkarrekin lagunartean iraungo ahal dugu betiko.

Hitzak: Iñaki Ortigosa

X. urteurreneko kontzertua

2012an abiatu zen Plentzia Kantagune taldea, beraz 10 urteko bidea bete dugu bukatzear den 2022an. Ordutik hona, ekimen asko atera dugu aurrera gure herrian eta Euskal Herriko beste kale-kantari taldeekin harremanak sendotu ditugu. Esan daiteke talde bezala osasuntsu heldu garela hamarkadara. Hori bai, bizitzaren legeari jarraituz guretariko batzuk bide bazterrean geratu zaizkigu, haiek guztiak gogoan ditugula egun hau ospa dezagun!

X. urteurrena ospatzeko ardatz nagusia kantua izango da eta horretarako, beti hurbil izan ditugun lagunak gonbidatu ditugu: Bostak eta Laurenak.

Hona hemen prestatu diguten egitaraua:

Bostak eta Laurenak taldeko partaide gehienak ezagutzen ditugu, haiekin kantuan sarritan topo egin dugulako hainbat eta hainbat herritan. Baina taldea? Bostak eta Laurenak taldea ezagutzen dugu?

Aurreko galderari erantzun nahirik, hauxe duzue taldeari egin diogun elkarrizketa:

Bostak eta Laurenak taldearekin solasean
Jatorrizko elkarrizketa (pdf)	Traducción de la entrevista (pdf)

Hona hemen gaurko emanaldiko kantutegia:

 

2022-12-06: San Nikolas Eguna

Jabier Axpe kantukideak osatutako bideoa

Iduzki denean

Iduzki denean abesti ezaguna da Euskal Herriko iparraldean batez ere. Ez dakigu nork idatzi zuen ezta noiz idatzi zen. Ematen du bikote baten arteko elkarrizketa bat dela, baina bertsoen artean ez dago jarraitasun argirik eta abestiaren zentzua ez da guztiz ulertzen.

Balizko interpretazio bat eman ahal izateko Jokin de Pedro lagunak bertso apokrifo bat idatzi du, eta bikotetik hirukotera jauzia egiten dugu. Jokin de Pedroren bertso berriak amodiozko hiruki baten kontakizuna bihurtzen da Iduzki denean abestia, non neska batek bi ezkongai dituen bata gogokoa dena eta bestea ez.

Jarraian Iduzki denean abestiaren hitzak eta azalpenak eskaintzen dira, non urdinez idatzi den 3. ahapaldia asmatutakoa den eta gainerakoak tradiziotik datozkigunak diren:

IDUZKI DENEAN

Iduzki denean, zoin den eder itzala! maitia, mintzo zira, plazer duzun bezala. egiten duzula mila disimula, inorant zirela; erraiten duzula bertzetaik naizela. Faltsuki mintzo zira. Zazpi urtez beti jarraiki zait ondotik, erraiten zautala, ez dut bertze maiterik; hitzer fidaturik nago tronpaturik gaixoa tristerik, ez dut eiten lorik, ez jan edan onik, maitia, zuregatik. Urzoak baitoaz une oro elkarrik zutarik maitia ez nagoke urrundik agote izanik ez dut izen onik hemen ez kanpotik, amodio garbirik bertzerik ez dut nik xangriz nauzu beterik. Oi! ene maitia, nik ere zuregatik, pasatzen dizut nik, zonbeit sabeleko min. Eskonduz zurekin samur ait'amekin, [samur = haserre] behar nindeite jin; ez dakit zer egin, ez eta nola jin, ni neure etxekoekin. Oi! ene maitia, nun duzu izpirituia? fediaren jabe, aita deraukazuia? atxikazu fedia maita bertutia libra kontzentzia, munduko bizia labur da maitia, ez zaitela kanbia.

Neskak gizon ganorabakoari: Maitia (esaten dio ironiaz) nahi duzun legez mintzo zara, mila disimula egiten duzu, inorantearena egiten duzu, bestelakoa edo bakana naizela diozu, eta laburbiltzeko: Faltsuki mintzo zara. Neskak gogoko duen gizonari: Zazpi urtez bere atzetik leial eta fidel ibili den mutilari erantzuten dio neskak, esanez berak ere maite duela. Gizon leialak neskari: Agote izate horrek eduki du bazterturik gixajoa, zazpi urtez, neskearen besoetatik. Orain, akabuan haren bihotza lortu duenean, neskearen gurasoak haserratzeko bildurretan dago. Neskak gogoko duen gizonari: Neska ere seko maiteminduta dago, baina badaki etxekoek ez dutela arraza madarikatu horretako bat familiara sartzen utziko. Neskaren “sabeleko minak” hitzez hitz harturik izan daitezke, baita ere, agotea zinez maite duenaren adierazgarri. Gizon leialak neskari: Agotearen hordagoa maiteari: izpiritua, fedia, bertutia, kontzientzia, horiek guztiak benetako amodioaren alde eta arrazakeriaren aurka jarri behar zaituzte, aitaren nahiaren ganetik!

Iduzki denean abestia Pantxoa eta Peio bikotearen ahotsean

 

Xorrotzak

Beñat Larrory 2016an, gaur egun Xiberoko Botza irratiko partaidea da

Xorrotzak kantaren hitzak Beñat Larroryk idatziak dira, eta izen bereko maskaradaren pertsonaiari buruz hitz egiten digu (maskaradako personaien argazkiak hemen kus daitezke). Xorrotzak maskarada beltzeko partaideak dira eta paper hori jokatzeko kantari onenak aukaratu ohi dira. Zuberoako maskadarari bururuzko informazio gehiago hemen: La maskarada de Zuberoa (gazteleraz).

Inauterietako segizioa den maskarada hainbat pertsonaiek osatzen dute, bi talde kontrajarritan antolatuta: gorriak eta beltzak. Gorrien bandoa onek edo ordenatuek osatzen dute; beltzen bandoa, berriz, gaiztoek edo deserrotuek osatzen dute.

Maskarada beltzeko partaideak:	Maskarada gorriko partaideak:
Buhameak (ijitoen taldea):  Buhame Jauna (ijitoen)  Zintzilau  Kauterak (kaldereroak edo pertza-konpontzaileak):  Kabana Handi (nagusia) Pitxu (kalderero aprendiza)  Fripu  Pupu  Xorrotxak (zorroztzaileak)  Kereztuak (zikiratzaileak)  Medizina (medikua)	Aintzindariak: Entseinaria (banderaduna) Txerreroa (errementaria) Gatuzaina (katua) Zamalzain (zentauroa) Kantiniersa (kantinera) Jauna eta Anderea Laboraria eta Laborarisa Marexalak (perretzaileak) Küküileroak (dantzari gazteak)

Xorrotzak: mutila eta nagusia

Jarraian Xorrotzak abestiaren hitzak eta azalpenak eskaintzen ditugu:

XORROTZAK
Bata mitila zelarik, bestea nausia, bena jokütik kanpo: Zer adixkidiak! Mezperan gaüa xuritürik gorri edatean, gorritü igantean xuriaren txestatzean. Bedatse bat izanik... Denbora den bezala errota üngüratzen, zahartzen hasirik gira bena ez ahültzen. Bi botzetan dütügü kantoreak gozatzen, hortan gira laketzen kobla oihükatzen. Bedatse bat izanik... Agitzen zaikü üsü gibel so egitea, urxantzaren bürüaren gainen fite txerkatzea. Ahatzerik beitügü urtoroz txapelak, dohakabez jabegoz kanbiatzen züala. Bedatse bat izanik, maskaraden botza sekülan ez beitügu ützi ofizioa. Xorrotza behin dena beti odolean, xorrotza behin dena beti dü gogoan.	Bata mutila eta bestea naugusia, hor Xorrotzen bikotea. Maskaradaren bezperako gaua zuriz joan zaie ardo gorria edanez, eta gorriturik daude biharamunean ardo zuria dastatzen. Denbora bezala gurpilak biratzen du, gu ere zahartuz goaz. Bi botzetan kantatuz plazerra hartzen dugu. Gertazen zaigu sarritan atzera begiratzea urtxantzak buru gainean bilatu nahirik. Zoritxarrez emandako txapelak ahazturik ditugu urtearen zehar. Udaberria da maskaraderen deia, sekulan ez diogulako egiteari utzi. Xorrotza behin dena ez du inoiz ahazten.
Hitzak: Beñat Larrory

Xiberotarrak taldearen Xorrotzak

 

[17] Urte berri egun ona

URTE BERRI EGUN ONA

Ur barrena, ur goiena urte berri egun ona, egun onaren seinalea hemen dugu ur berria. Soroan eder goldea, haren gainean belea etxe hontako nagusi jauna nekazaritxo noblea Ur barrena... Etxekoandre giltzaria ireki zazu atea badugu lanan ur berria, har dezagun gozaria Ur barrena... Eguzu bada, eguzu, baldin eman nahi baduzu, baldin eman nahi baduzu eta bota gaitzazu Ur barrena... Armariuan dabil sagua, hari seguka katua etxe hontako limosnarekin ez da beteko zakua Ur barrena...

Hitzak: Kopla herrikoiak

Igelaren Banda eta Izaro: Urte berri egun ona

Ur barrena, ur goiena esakeraren azalpena hemen.

 

[16] Xorieri mintzo zen

XORIERI MINTZO ZEN

Xorieri mintzo zen, mintzo zen errekari, oihaneko zuhaitzeri, ta zeruko izarreri; mintzo zen haizeari, xoro batentzat zaukaten; xorieri mintzo zen, xoro batentzat zaukaten. Ez zakien irakurtzen gizonen liburutan bainan ongi bazakien zeruko seinaletan, zeruko seinaletan ta jenden bihotzetan. Haurrek zuten harrikatzen, zahar gaztek trufatzen; etxekoek berek ongi laneko baliatzen, laneko baliatzen eta gosez pagatzen. Hil da xorua bakarrik, bakarrik da ehortzi. Etzen han kristau bat ere, salbu lau hilketari, salbu lau hilketari ta apeza kantari. Hil hobian ezartzean, haizea zen gelditu, xoriak ziren ixildu, zerua zen goibeldu, zerua zen goibeldu ta jendea oroitu.

Hitzak eta musika: Mixel Labéguerie

Kantaria: Erramun Martikorena                         Hitzak: Mixel Labéguerie

Poemaren azalpena hemen. Mixel Labéguerieren biografia hemen.

 

[15] Mozarten topa

MOZARTEN TOPA
Bete ardoz zure kopa, luza besoa eta topa; maitasuna, ardo ona; hau da gure ondasuna. Zalantzan gaudela dirudi, buru makur eta urduri; edan, edan, beldur barik, beldur barik topa umore onari. Gozatu gabe zertan sufritu, gozatu gabe zertan sufritu. Edan, edan! Edan, arraioa, zer nahi duzu? Bizipoza izateko ardoa eta umorea. Gora! Gora! Gora! Gora biak!	(dirudi) Bete ardoz zure kopa, luza besoa eta topa; maitasuna, ardo ona; hau da gure ondasuna. Zalantzan gaudela dirudi, buru makur eta urduri; edan, edan, beldur barik, beldur barik topa umore onari. Gozatu gabe zertan sufritu, gozatu gabe zertan sufritu. Edan, edan! Edan, arraioa, Gora biak!
Doinua: W. A. Mozart Hitzak: Jokin de Pedro

Mozart-en topa bi ahotsetan

 

Mundua ala gu

Mundua ala gu kanta Alboka taldeari zor diogu eta esan daiteke lan partekatu bat izan dela, bertan eskua sartu duten artistak hauek izan direlako:

• Joxan Goikoetxea (akordeoia)
• Alan Griffin (txistu irlandarra)
• Fiachra Mac Gabhann (bouzoukia eta mandolina)
• Alex Sardui (1. ahapaldiko ahotsa)
• Petti (2. ahapaldiko ahotsa)
• Eñaut Elorrieta (3. ahapaldiko ahotsa)
• Mikel Urdangarin (4. ahapaldiko ahotsa)
• Amets Arzallus (5. ahapaldiko ahotsa)

Hitzak Amets Arzallusek idatziak dira eta atzematen da kantari bakoitzari ahapaldi propioa jarri ziola, edo behintzat horrela ikusten dugu guk. Banan-banan zerrendatuz:

1. Alex Sardui gernikarra: Gorozikako seme soldadu eta rockeroa
2. Petti beratarra: Ibardineko langile kottadua
3. Eñaut Elorrieta: Ilargiari, izarrei, itsasoari eta borrokari kantuan beti
4. Mikel Urdangarin zornotzarra Gasteizen errotua: Bitoriako Matxete eta Kutxillerian zehar
5. Amets Arzallus: galdera berrien eskean beti

Alboka: euskal folk musikaren taldea

Jarraian abestiaren hitzak eskaintzen ditugu:

MUNDUA  ALA  GU
Gorozikako seme, frenteko soldadu, mendian larrartean sentitu naiz salbu... Rockaren izenean neure aita saldu, baina zimur artean duda zait zabaldu: nor aldatzen da gehien mundua ala gu? Kañabera sorotan hamaika esklabu, ta ni Ibardineko langile kottadu... Puruek zenbat hosto, ronak zenbat gradu, zintzur erlastu honek galdera bat badu: nor aldatzen da gehien mundua ala gu? Ilargi erori bat, ta lau izar galdu, itsaso uhertu bat guregan dakargu, borroka xarmatuak berea eman du, ta galdetu nahi dugu ez bada berandu: nor aldatzen da gehien mundua ala gu? Bitoriako blusak ator ederra du, gitarra zahar batekin Matxeten azaldu, gero Kutxillerian eguna zabaldu... Goizean ispiluak galdetuko balu: nor aldatzen da gehien mundua ala gu? Bizi denak derrigor aldatu behar du, munduak itzulika tai gabe dihardu, kontraesan guziak hartuz geure kargu, herri honek aurrera jarraitu nahi badu, galdera berri baten beharra daukagu. erantzun zaharrekin erdoildu gara gu ta galdera berrien beharra daukagu.
Hitzak: Amets Arzallus

Alboka taldearen Mundua ala gu

 

2022-11-25, ostirala, entsegua

[eu] | [es]

Dakigunez hilean birritan elkartuko gara, egun batean kantujira egiteko eta beste egunean entsegua gehi kantujira egiteko. Entsegua egingo dugun hilearen egun horretan Itsaso Arrieta etorriko zaigu. Hona hemen lehen hitzordua: Formatua: entsegua (Itsasorekin)  Eguna: azaroaren 25ean, ostirala  Ordua: 19:30ean Tokia: Kristo Ermita Bukatzeko kantujira Plentziatik zehar.

 

Ekialde

Ekialde kanta eta dantza Ederlezi pastoralerako sortu ziren. Ederlezi pastorala Mixel Etxekopar musikariak egin zuen Nicole Lougarot idazlearen Bohémiens liburuan oinarriturik.

XVII. mendeaz geroztik ijitoek Euskal Herrian izandako gorabeherak kontatzen ditu Ederlezi pastoralak, eta lehen aldiz 2013ko martxoaren 24an taularatu zen Zuberoako Gotaine-Iribarnen (Mixelen eta Nicolen herrian).

Ederlezi festa baten izena da erromani hizkuntzan, da eta festa horren bitartez ijitoek udaberriaren etorrera ospatzen dute. Ederlezi hitza, baita ere, Balkanetako ijitoen kanta folkloriko ezagun baten izena da.

Ederlezi pastoraleko zenbait arizale

EKIALDE

Ekiaren ekialdean Ekialde, sortaldearen sartaldean Mendebalde, hegoaren bide bürüan Iparralde eta ni bideen artean lau haizeen jabe. Beti nor ekialdean edireiten da bidean, kantu bat gogoz aidean biziaren izenean. Rom, sinti, buhame, gypsy, ber koloreko irrintzi, atzo, egun, bihar, etzi, goiz ekiari ez etsi. Jin baledi oren latza, hunaintiko akabantza, arrahas dezagün dantza, bizi nahiaren hatza. Hi tzigano entzün ezak, gilikeautüko deiat, bidez bide hebentik harat honki jin hire etxerat. Ekiaren ekialdean Ekialde, sortaldearen sartaldean Mendebalde, hegoaren bide bürüan Iparralde eta ni bideen artean lau haizeen jabe.

Hitzak eta musika: Mixel Etxekopar Dantzaren koreografia: Nicole Lougarot

Ekialde sokadantza Patxi Laborda dantzamaisuak azalduta

Bideoaren atal nagusiak:

• Sarrera eta lehen azalpenak 5:16
• Egitura erritmikoa 6:30
• Urratsak 7:43
• Dantza 8:37

 

2022-11-11, ostirala, kantujira

[eu] | [es]

Dakigunez hilean birritan elkartuko gara, egun batean kantujira egiteko eta beste egunean entsegua gehi kantujira egiteko. Aste honetan kantujira izango dugu. Hona hemen lehen hitzordua: Formatua: kantujira  Eguna: azaroaren 11an, ostirala  Ordua: 19:30ean Tokia: Elizako Plaza

 

[14] Apaizak tiraka pin pon

Antonio Zavala ikertzaileak idatzitako Karlisten bigarren gerrateko bertsoak liburuan jasorik datoz kopla hauek 403. orrialdean, non sortaren izenburua Zein dira, bada, zein dira juan zaizkigunak mendira? den. Egilea ez da ezagutzen baina badakigu 1873n urtean idatzi zirela:
 

Jarraian hitzak ematen dira jatorrizko idazkera mantenduz:  

APAIZAK TIRAKA PIN PON

Zein dira mendiyetan diranak pozkiroz? Relijiyuen alde dabiltzanak tiroz? Apaizak tiraka pin pon dabiltza ti-ta tikiti pin pon Zein dirade tenpluak abandonatuta soldadu juan diranak oso arrotuta? Apaizak... Zein dira gure ustez txit onak ziranak? Orain gizonak iltzen pozez dabiltzanak? Apaizak... Zein dira lotsa gabe diabruz josiyak, Jaunak bere eskutik dauzkanak utziyak? Apaizak... Zein dira gerrarako gizon billa aurten ari diranak fuertzan jendia eramaten? Apaizak... Zein dira mingañ eder biotzez palsuak, onak nai gaituztenak bueltatu gaiztuak? Apaizak... Zein dabiltza soldadu gure Españiyan, basoko auntzak bezela saltoka mendiyan? Apaizak... Eztezula asmatzen ara nik apustu, odola ixurtzen dala diradenak poztu? Apaizak... Orra nik asmatu ibilli gabe estu: bai, apaizak dirade, justu, justu, justu. Apaizak tiraka pin pon dabiltza ti-ta tikiti pin pon

Hitzak: Kopla herrikoiak

Diskoa: eta tira eta tunba       Kantaria: Joseba Tapia

 

2022-10-21, ostirala, entsegua

[eu] | [es]

Dakigunez hilean birritan elkartuko gara, egun batean kantujira egiteko eta beste egunean entsegua gehi kantujira egiteko. Entsegua egingo dugun hilearen egun horretan Itsaso Arrieta etorriko zaigu. Hona hemen lehen hitzordua: Formatua: entsegua (Itsasorekin)  Eguna: urriaren 21ean, ostirala  Ordua: 19:30ean Tokia: Kristo Ermita Bukatzeko kantujira Plentziatik zehar.

 

2022-11-13, Balmaseda (autobusa non eta noiz)

Azaroaren 13an Balmasedara joango gara. Autobusaren geralekuak hauek izango dira:

PLENTZIA, 9:00

Areatza Hiribidea, 1B 48620 Plentzia, Bizkaia

GPS koordenatuak: 43.405253, -2.949133

IBARREKOLANDA, 9:30

Ibarrekolanda Kalea, 17 48014 Bilbo, Bizkaia

GPS koordenatuak: 43.273530, -2.954068

Itzulerako gutxi gorabeherako ordutegia: Bilbon 20:00etan eta Plentzian 20:30etan.

2022-11-13, Balmaseda

Plentzia Kantagunearen X. urteurrena dela eta, azaroaren 13an (igandea) txangoa egingo dugu. Balmasedako lagunekin (NKT eta Balmaseda Kantari) hitzordua jarrita daukagu, elkarrekin kantujira bat egiteko. Egitasmoa hauxe da:

• Irteera:
• Plentzia, 9:00 
• Bilbo, 9:30

• 10:30, La Enkartada Fabrika-Museoari bisita gidatua
• 12:15, Balmasedako Alde Historikoari bisita gidatua
• 13:30, kantupoteoa Balmasedeko kaleetan
• 15:00, bazkaria Horkasitas Jauregian, menua: indabak sakramentuekin + entsalada + postrea + kafea
• Bazkalostean, kantuak eta dantzak NKT taldearekin eta Balmaseda Kantarirekin
• 19:30, etxerantz abiatu 

Balmaseda:

La Encartada Fabrika-Museoa, Balmasedako Zubia eta Horkasitas Jauregia

Ordainketak egiteko kontua:  Kutxabank ES54 2095 0062 10 9116720969 Plentziako Kantagune taldeko bazkide bakoitzeko 25€ dira (bidaia, bisita gidatuak  eta bazkaria barne). Plentzia Kantaguneko kideek lehentasuna izango dute urriaren 31aren arte. Azaroaren 1etik aurrera Plentziako Kantagune taldeko bazkide ez direnen lagunen izenak onartuko dira, lagun bakoitzeko 25€ direlarik (bidaia, bisita gidatuak eta bazkaria barne). Partaideen zerrenda bat irekiko dugu WhatsApp aplikazioaren INFO-Plentzia Kantagunea harian. Beti bezala, Plentzia Kantaguneko diruzainak eguneratuko du zerrenda hori ordainketak eginak daudela ikusten dituen einean.

Cuenta para los ingresos:  Kutxabank ES54 2095 0062 10 9116720969 Cada socio o socia de Plentziako Kantagune pagará 25€ (viaje, visitas guiadas y comida incluidos). Los socios y socias de Plentzia Kantaguneko tendrán preferencia hasta el 31 de octubre. A partir del 1 de noviembre se admitirán ingresos de las personas no asociadas a Plentziako Kantagune, cada amigo o amiga ingresará 25€ (viaje, visitas guiadas y comida incluidos). Se abrirá una lista de participantes en el canal INFO-Plentzia Kantagune Taldea de WhatsApp. Como siempre, la persona encargada de actualizar dicha lista será el tesorero de PK que lo irá haciendo a medida de que tenga constancia de los ingresos realizados.

2022-09-30, ostirala, entsegua

[eu] | [es]

Ikasturte berriari hasiera emango diogu aste honetan. Hilean birritan elkartuko gara, egun batean kantujira egiteko eta beste egunean entsegua gehi kantujira egiteko. Itsaso Arrieta hilean begin etorriko zaigu, entseguak izango ditugun egunetan. Hona hemen lehen hitzordua: Formatua: entsegua (Itsasorekin)  Eguna: irailaren 30ean, ostirala  Ordua: 19:30ean Tokia: Kristo Ermita Bukatzeko kantujira Plentziatik zehar.

 

2022-09-03an XI. Plentzia Kantari

Plentzia Kantari eguna badator. Hamaikagarren ekitaldi honen egitarauak bi zati izango ditu. Batetik, kalejira bat egingo dugu arratsaldeko 19:30etan Plentziako Zubitik hasita eta Azurtegiondo enparantzan bukatuta. Ondoren, kalejira bukatu ostean, Eliza Enparantzan, Patxi eta Konpainia lagunekin batera dantzan arituko gara gaueko 22:30etan hasita. Gogoratu ondoko hitzordua daukagula: Eguna: irailaren 3an, larunbata  Ordua: 19:30etan Tokia: Plazatxoa (Zubiko Plaza) Hona hemen ibilbidearen mapa. Zenbakien gainean sakatzean, pausagune bakoitzan kantatuko ditugun abestien izenburuak ikusiko dituzu: Ikusi XI. Plentzia Kantariren ibilbidea mapa handiago batean Hauxe da erabiliko dugun liburuxka:

 

[13] Hondartzako muxuaren himnoa

Jon Maia bertsolariak 2021ean argitaratutako Kantu bat gara diskoko abesti bat da Hondartzako muxuaren himnoa abestia.

HONDARTZAKO MUXUAREN HIMNOA

Etorkizunik ez baldin badu zertarako nahi dut memoria? Hobe da hirusta txiki izan ta ez haritz handi eroria. Zertarako ote da musika? Zertarako itsaontzi bat martxan? Gaur ez dut nahi kantatu epika, nahiago dut muxu bat hondartzan. Joan ziren haien negarra baino hobe da datozenen irria. Pasatako egunik ez da itzultzen, goizero sortzen da bat berria. Adio aita, adio ama, etxean utziko dut zauria. Uztazu behingoz ixten orbaina, orain zertara zatoz euria? Nik libre bizi nahi dut bizitza, ez bainaiz bi alditan biziko. Ez dugu gerra bera galduko, ez gaituzte bi alditan hilko.

Hitzak: Jon Maia Musika: Nacho Soto

Hondartzako muxuaren himnoa Jon Maia eta Antton Latxa

 

[12] Herrimina

Ganbara taldeak 1985ean argitaratutako Banan-banan diskoko Herrimina abestiak Aita Polikarpo Iraizozkoak idatzitako Oriko Txoria olerkiaren bi ahapaldi erabiltzen ditu:

HERRIMINA (jatorrizko idazkeran emana)

Zeruan eder ilargia izarren aitzindari; Aren ondoan artizarra goizean da nabari. Aiek zerutik beira daude nere sorterriari: Ni berriz basabazter ontan nigarretan naiz ari. Txoriak ere kantatzen du baratzeko esian: «Ori’ko txoria laket da beti Ori-mendian»; uda ta negu, gau ta egun an bizi da lorian. Nik ere bizi ta il nai dut sortu nintzen tokian.

Hitzak: Aita Polikarpo Iraizozkoa Musika: Ganbara Taldea

Oriko Txoria edo Herrimina Ganbara taldearen bertsioa

ORI'KO TXORIA (jatorrizko idazkeran emana)

Zeruan eder ilargia izarren aitzindari; Aren ondoan artizarra goizean da nabari. Aiek zerutik beira daude nere sorterriari: Ni berriz basabazter ontan nigarretan naiz ari. Zoritxarrean lekutu naiz jaio nintzen txokotik. Zoriona bilatu naiez, atsegin ondotik; aunitz erritan ibili ta leiatu naiz gogotik; baina biotzak eztu onik, nion eztu gozorik. Txoriak ere kantatzen du baratzeko esian: «Ori’ko txoria laket da beti Ori-mendian»; uda ta negu, gau ta egun an bizi da lorian. Nik ere bizi ta il nai dut sortu nintzen tokian. Oi erri maitea, zu zaitut orai nere gogoan; zure izen xoragarria maiz dadukat agoan; gauez ere zutaz ari naiz beti amets gozoan: Jaunak berriz jarriko al nau laster zure altzoan!

Hitzak: Aita Polikarpo Iraizozkoa (Agustin Zarranz)

Abestiaren nondik norakoak jakiteko eta nolabaiteko itzulpena ikusteko, joan blog honetako 23. fitxara. Hona hemen Aita Polikarpo Iraizozko idazle kaputxinoaren biografia: